Stjórn Gígjunnar hefur, í samráði við landsmótsnefnd Kvennakórs Reykjavíkur, ákveðið að fresta landsmóti Gígjunnar, sem fara átti fram dagana 7. – 9. maí nk. um eitt ár. Mun mótið verða haldið í maí 2021 og stefnan tekin á dagana 6. - 8 maí. Mun landsmótsnefnd leitast við að tryggja að allt verði með sama sniði og með sömu áherslum og nú þegar hefur verið ákveðið og mun staðfest dagsetning verða send út um leið og búið er að tryggja aðstöðu og húsakost vegna mótsins.

Með þessu vilja Gígjan og Kvennakór Reykjavíkur eyða allri óvissu vegna þessarar fordæmalausu stöðu sem uppi er í samfélaginu. Með því að fresta mótinu um heilt ár ætti kórum að gefast nægur tími til skipulagningar, vorið er besti tíminn í kórstarfi til að mæta á landsmót þar sem kórar hafa haft allan veturinn á undan til æfinga og undirbúnings.
Einnig leggur landsmótsnefnd Kvennakórs Reykjavíkur mikla áherslu á að halda eins glæsilegt mót og hægt er og með því að fresta mótinu um heilt ár gefst nefndinni aukið svigrúm til að tryggja að öll aðstaða og aðföng verði sem allra best.

Öllum kórum sem höfðu skráð sig á landsmót í maí 2020 og greitt staðfestingargjald, stendur til boða að fá gjaldið endurgreitt en einnig geta kórar geymt greiðsluna sem staðfestingu fyrir þátttöku á mótið í maí 2021. Það er hverjum kór í sjálfsvald sett hvernig þeir kjósa að hafa það. Ef kórar kjósa að geyma greiðsluna og fjöldi þátttakenda frá hverjum kór breytist, þá verður það gert upp þegar nær dregur. Ef kórar kjósa endurgreiðslu, þá er best að senda póst á landsmot2020@kvennakorinn.is og landsmótsnefnd endurgreiðir um hæl.
Breytt dagsetning vegna lokagreiðslu verður send út síðar.

Strax eftir helgi hefst vinna hjá landsmótsnefnd Kvennakórs Reykjavíkur við það að endurbóka allt það sem tilheyrir svona stóru móti og verður staðfest dagsetning fyrir landsmót í maí 2021 send út eins fljótt og mögulegt er.

Ég veit að þið, kæru kórkonur, sýnið þessu skilning og vona að þið mætið allar sem ein með gleðina að vopni á landsmót Gígjunnar í Reykjavík í maí 2021. Ef þið hafið einhverjar athugasemdir, spurningar, ábendingar, eða hvað sem er þá tekur landsmótsnefnd fagnandi á móti þeim í gegnum netfangið landsmot2020@kvennakorinn.is

Ég óska ykkur alls hins besta í ykkar kórstarfi, hvernig sem því mun verða háttað á komandi vikum og mánuðum og sendi rafrænt knús á línuna.

Fh. Stjórnar Gígjunnar og landsmótsnefndar Kvennakórs Reykjavíkur,
Kolbrún Halldórsdóttir, formaður Gígjunnar

Kvennakór Reykjavíkur auglýsir eftir vönum kórsystrum í allar raddir en þó sérstaklega í sópran

Við hlökkum til að sjá ykkur. 

Kvennakór Reykjavíkur fagnar vorinu með lúðraþyt á vortónleikum sínum í Langholtskirkju þann 4. maí nk kl 16:00.

Sérstakur gestur er Ari Bragi Kárason trompetleikari.

Dagskráin er mjög fjölbreytt. Kórinn er á leiðinni til Ungverjalands í júní og er fyrri hluti tónleikanna helgaður verkum af því tilefni. Við munum meðal annars frumflytja Eld, verk eftir ungverska tónskáldið Peter Tóth, við texta Þórunnar Guðmundsdóttur og var það sérstaklega samið fyrir kórinn.

Eftir hlé breytir kórinn um takt þar sem trompetleikurinn verður allsráðandi í polka, swing og boogie woogie. Kórinn leitar m.a. í smiðjur Andrewssystra, Guðrúnar Á. Símonar og Lady Gaga þannig að allir ættu að finna eitthvað við sitt hæfi.

Stjórnandi kórsins er Ágota Joó og hljómsveitarstjóri er Vilberg Viggósson.
Hljómsveitina skipa Einar Scheving á trommur, Hávarður Tryggvason á kontrabassa, Vilberg Viggósson á píanó og Zbigniew Dubik á fiðlu.
Sérstakur gestur kórsins á tónleikunum er eins og áður segir Ari Bragi Kárason trompetleikari.

Miðaverð: 3.500 kr í forsölu, 4.000 kr við innganginn.

Miðar fást hjá kórkonum eða með því að senda tölvupóst á netfangið postur@kvennakorinn.is

Kvennakór Reykjavíkur hefur fengið það stórskemmtilega og risastóra verkefni að halda landsmót Gígjunnar, landsambands kvennakóra í maí 2020. Undirbúningur er hafinn á fullu og hófst í raun strax í rútunni á leiðinni heim frá síðasta landsmóti á Ísafirði vorið 2017. 

Mótið verður haldið dagana 7. - 10. maí 2020 í Háskólabíó og nærumverfi þess. 

Allar upplýsingar varðandi mótið má finna á síðu mótsins kvennakorinn.is/landsmot-2020

Einnig munum við birta myndir af undirbúningi og fleira á samfélagsmiðlum undir myllumerkinu #syngjandivor2020

Kvennakór Reykjavíkur óskar eftir hressum og öflugum konum á aldrinum 20-50 ára til að taka þátt í kórstarfinu og býður öllum þeim sem hafa áhuga að koma á opna æfingu með kórnum. Æfingin verður miðvikudaginn 29. ágúst kl 19 að Vitatorgi (gengið inn frá Skúlagötu). Þar gefst öllum áhugasömum konum að hitta kórkonur í Kvennakór Reykjavíkur, syngja með og fara svo í raddpróf að lokinni æfingu.
Nánari upplýsingar fást með því að senda póst á postur@kvennakorinn.is
Við hlökkum til að sjá ykkur

Kvennakór Reykjavíkur á 25 ára afmæli í ár og mun fagna afmælinu með tvennum stórglæsilegum afmælistónleikum þann 5.maí nk og verða þeir fyrri kl 14 og þeir síðari kl 17.

Kórinn mun hrista rykið af lögum sem hafa fylgt honum í gegnum tíðina og einnig flytja lög sem hafa verið útsett fyrir kórinn í tilefni afmælisins. Sum lögin krefjast bæði þjálfunar hugar og handa og jafnvel fóta og öll eru þau vel valin og umfram allt skemmtileg. Í andyri Seljakirkju verður á sama tíma sýning á auglýsingaplakötum kórsins í gegnum tíðina en þau eru hönnuð af einstakri snilld af Andreu Haraldsson hönnuði og heiðursfélaga kórsins. 

Kvennakór Reykjavíkur hefur 25. afmælisárið sitt með pompi og prakt með stórtónleikum ásamt hljómsveit í Hörpu, þann 13.janúar undir yfirskriftinni Gala. Sérstakur gestur verður Þóra Einarsdóttir sópransöngkona. Flutt verður sígild Vínartónlist, t.d Trinklied úr La Traviata, Radetzky March, Nunnukórinn úr Casanova og On The Blue Danube í bland við nýrri tónlist, t.d. The Pink Panther, My Way, Bohemian Rapsody og hið ljúfsára Mutter með Rammstein.